日本插画家あーちゃん(@a_chan_paint) 有感男女对于M痛认知有好大分歧，加上冇M痛嘅女生都未必理解有几痛，于是将每个女生遇到嘅「M痛程度」变成插画，等大家都容易明白。
总括而言，MM痛分5种程度：
1.反而仲精神
好少见呢种女生但真係有架，会因为「身体排出污秽物」而产生畅快感。
2.间中唔舒服
呢种人应该最多，腹部有唔舒服嘅感觉，但觉得「只不过係M痛，忍一忍就过啦」，网主偏见认为讲大话唔上游水堂嘅女生都係呢一类。
3.难受
面色差，望落似好唔舒服咁，面对旁人关注「你OK吗?係唔係唔舒服」，只能回答「我冇事(因为M痛)」。
4.超难受
痛到出唔到声，因为太痛而情绪不稳，有可能係妇科病，最好去医院check check。
5.会晕低
痛到行都行唔到甚至会痛到晕，呢类女生为数唔多但确实有人係咁，好易被人误会係讲笑或被取笑「有冇咁夸张呀」，好惨!
贴文一出引来唔少「4号」女生哀鸣:
「我介乎4与5之间，因为朋友大部份都係2，成日畀佢哋笑『月经边有咁痛呀?你太夸张…』」
「我就係4号，非常明白痛到快晕嘅感觉，但都係要忍住，旁边嘅人就会话『睇起嚟唔係好痛呀』，问题係返到屋企自己一个人痛到5号咁危险时又冇人见到，你哋理解我嘅痛苦吗?」
「我係第二日4号之后3号，到而家都仲係好讨厌嗰个明明肚好痛仲逼我跑马拉松嘅老师!」
「我屋企附近间学校规定『经期一样要落泳池』，叫学生塞棉条。」
「我读书时体育女老师同我讲『经期第8天?会唔会太耐?呃人呀?』」
每个女生经期长短不一，M痛症状都好唔同，男人无法理解都算，但同样係女生却无法体谅女生嘅痛，先至係最大打击呀。
图片来源：タケダ健康サイト
