由田蕊妮主持嘅新节目《女人四十》自播出之后大受家庭观众同网民欢迎，节目大谈女人去到四十岁时所面对嘅问题挣扎同生活态度，好似女人去到四十岁都未结婚甚至冇拖拍究竟係一个点嘅故事。节目搵嚟唔同嘅嘉宾大谈《女人四十》，好似有卓韵芝、谷祖琳、杜如风，车婉婉等......《女人四十》除咗题材新颖同阵容强劲之外，另一个受欢迎嘅之处就係入面嘅金句好贴地同好有共鸣。
1. 「四十岁才是女人的开始」
呢一句可以话係《女人四十》嘅宗旨，阿田希望透过呢个节目话比大家知四十岁并唔係结局，而係重生。边个话得男人先愈老愈有魅力，其实女人一样係。为咗证明四十岁一样可以活得精彩同作出新尝试，阿田喺节目入面踏出咗好多个佢人生嘅第一次，好似第一次参加speed dating，第一次学剪片等等。
2. 「四十岁后，开始懂得拒绝、开始懂得选择。」
会发现随着年纪嘅增长，「选择困难症」嘅情况会有下降嘅趋势，因为经历会令你懂得选择同拒绝。嘉宾谷祖琳话：「四十岁开始懂选择和拒绝别人，时间很宝贵，我要编排一下。之前，只不过是累积错误，开心过、赢过、输过，现在正是建立自己性格的时候。到了四十岁会很清楚自己，四十岁最正！」四十岁嘅你会好清楚你嘅路应该点行，都好清楚自己想要啲咩。
3. 「女人要结婚，从来都不是件难事，嫁得好才更难！」
成日听到身边嘅女生会话希望三十岁之前结婚，三十岁就好似一个deadline咁，为咗赶到喺限期之前嫁得出可能已经唔再介意係唔係真心爱对方，但求有人钟意自己并想同自己过人世就够。闪婚嘅卓韵芝就话「女人要结婚，从来都不是件难事，嫁得好才更难！」，要寻觅到一个真心爱你你又爱佢嘅人，就算爱情迟来一点又怕什么？
4. 「解决不了的事情，终有一天会解决。」
年轻嘅时候或者会觉得一发生问题就必定要当下解决，但经过岁月洗礼你会知道「无法即时解决的，就留到明天，总有能解决的一天。」比起年轻时心急嘅自己，四十岁嘅你遇到问题会变得从容不逼，会先观察情况再谂解决方法。
5. 「无论几岁，都需要冲动。」
你会发现人生好多事情都係需要冲动才能完成，所以唔应该因为年纪而失去咗冲动呢种感觉，想做就去做啦！
6. 「不要被年龄限制，只要愿意尝试就能做到。」
四十岁对阿田嚟讲只係一个数字，并未为佢造成任何限制，佢认为无论几多岁都好，只要你肯尝试就会做到。以佢自己为例，四十岁嘅阿田依然活跃于健身、wakesurf，可见年纪并唔係一个问题，问题係在于你肯唔肯试、肯唔肯踏出第一步、肯唔肯相信四十岁并唔係终点。
