娱乐圈近年不少人气女星都係孖住上，讲紧嘅係两姊妹凭强大基因同埋才华齐齐上位，各自吸引大批粉丝之余又互撑晒温情，以下几对姊妹个个又靓又有观众缘，你又钟意边个？
黄心颖与黄心美
讲起圈中两姊妹，不得不提黄心颖同黄心美，「心颖BB」于大台发展顺利，大家姐黄心美于ViuTv都愈战愈勇，两姊妹更不时孖公仔出席活动吸金，齐齐「圈粉」！
「心颖BB」2012年封香港小姐亚军，样靓身材正，电力十足，近年连视坛男神马国明都被「收归旗下」，成为公仔箱金童玉女！
家姐黄心美毕业于英属哥伦比亚大学，操流利英语、广东话同普通话，初入行曾签约做歌手，后来却被派去电视台做娱乐主播，辗转成为着名主持，担任大大小小过百活动嘅主持。
2015年失婚，但未有要求前夫畀赡养费，全心工作自给自足，近年储落大批粉丝！
汤洛雯与汤乐瑶
港姐出身嘅公仔箱女神汤洛雯近年人气急升，月前请一家去马尔代夫旅行密密晒福利照，读紧大学嘅妹妹汤乐瑶被发现同样有齐女神Package，有样有身材又有学历，成为网民热话，两姊妹仲有合作拍埋广告！
汤洛雯选完港姐就密密拍剧拍节目，《爱·回家》嘅「李思思」一角帮佢入晒屋，加埋主持《学是学非》谷尽人气，甜美笑容与电眼，加埋Fit爆身材为佢收纳唔少粉丝，成为电视台力捧新一代小花，佢同罗天宇4年情月前玩完，近期就被爆挞着郑子邦，坚係劲抢手！
汤乐瑶仲未係圈中人就已经劲有人气，除咗两姊妹嘅旅行相出晒位，佢自己于社交网大方放送嘅靓相比家姐更加大方同埋火辣辣！而读紧法律系嘅佢仲係高材生，之前于Ig同粉丝对答就未有拒绝毕业后入行，唔知第时会唔会同家姐姊妹档？
虽然人气劲强，但汤乐瑶就已经有个拍拖两年嘅男友，更不时放闪，宅男暂时无望！
倪晨曦与倪晨晔
「80后」网络女神倪晨曦嘅孪生妹妹倪晨晔同样选美出身，两姊妹一样有个靓样，而家姐入行成人气女星之际，原来妹妹已经封盘做人妻！两姊妹不时于社交网晒温情，笑容一样劲Sweet！
倪晨曦于南京出世，一家早年移民加拿大，喺多伦多参选过当地华裔小姐称冠，后来于2006年转战国际华裔小姐，回港发展成为美容瑜珈达人，多线发展，亦係新一代Ig女神！
至于倪晨晔就喺2007年跟家姐步伐参选多伦多华裔小姐，更夺得「魅力传城大奖」，不过后来未有入行，反而嫁咗人组织家庭，现在于加拿大居住。
倪晨晔育有两个囡囡，不时于社交网晒幸福家庭照！
余香凝与余洁滢
余香凝（Jennifer）与余洁滢（Zoe）好似饼印一样，有索样又有高眺身形嘅佢哋同样係模特儿出身，Jennifer大Zoe三年，二人不时于社交网Share撞样相，真係傻傻分不清楚！呀妹仲成日有Warm爆留言晒温情，姊妹情深！
Jennifer前年先凭《骨妹》跑出，虽然情路闹出偷食风波影响形象，但默默工作收复失地，出演多部票房大收港产片包括《逆流大叔》同《非同凡响》，贴地谢票获唔少粉丝支持，佢更不时分享运动相，大晒健康性感气息，粉丝Like爆！
佢上年仲踩过界做埋歌手，公开演出时，Zoe都有撑场，场面Sweet！
至于Zoe就于公仔箱发光发热，今年于新一辑《美女厨房》做「美女学徒」，制服Look青春又养眼，后来更赢埋美女学徒厨神嘅荣誉，坚「入得厨房，出得厅堂」，轻易突围而出，而佢平日亦好大方于社交网晒粉丝福利照，人气强劲！
